اسلام او گلوبلایزېشن (Globalization)

حمد او شکر دي وي هغه لوی څښتن جل جلاله لره چي د ټولو نړيوالو رب او پالونکی دی. درودونه او سلامونه دي وي پر حضرت محمد مصطفی صلی الله عليه وسلم باندي چي ټولو نړيوالو ته يې د رحمت او وروستي پيغمبر په توګه لېږلی دی.
د اسلام او نړيوالتوب ( Globalization) په نامه کتاب مي وکوت. تکړه او هڅاند ليکوال ښاغلي نقيب الله احمدي په ډېر پام او تپاک ليکلی دی. حقيقت دا دی چي ډېر زيار يې پر کښلی دی، ډېر مأخذونه يې پر کتلي او د خپلي تر کار لاندي موضوع په اړه يې د لا زياتي څېړني او معلوماتو راټولولو لپاره يې په ويبپاڼو کي اړوند مضامين هم تر نظر تېر کړي او لازمه ګټه يې ځني اخيستې ده.
د کتاب موضوع هم ډېره مهمه او د جدي پاملرنې وړ ده. د نړيوالتوب موضوع، کومه چي امريکايي امپرياليزم او پلويان يې په دې وروستيو کلونو کي په خورا زياته کچه تبليغوي او لار ورته اواروي، څو بالاخره تر دې عنوان لاندي وکولای سي د ټولي نړۍ خلک او هرڅه د امريکايي ښکېلاک په وړغندي کې ښکېل او د خپلو ښکېلاکي، مادي او ظالمانه هيلو او ګټو سره سم يې تناو کړي او څنګه چي يې خوښه وي واک پر وچلوي. چي دا به بيا شوروي کمونيزم نه، بلکې يو بل ډول امريکايي، امپرياليستي کمونيزم وي.
په اصل کي دا هماغه د باطل او باطل پالو اهداف دي، چې پر باطلو بنا دي او اوس يې په دې نامه په زور او ځواک، چل ول او ورته د مخينې چمتو کولو سره د ځمکي د ټولي کرې لاندي باندي شتمنيو خپلولو او ټولو وګړو د اېلولو او تر خپل جغ لاندي راوستلو لپاره تحقق او پلي کول غواړي. خو اين خيالست و محالست وجنون، ځکه په زور کلي نه کېږي او د زور ياري د خره سپرلي ده.

زه د خپلو درنو هيود والو څخه مشران دي که کشران د دوی د يوه کوچني خادم په صفت هيله کوم چي دغه کتاب هرو مرو ولولي، د هيواد په ټولو لويو او وړو کتابتونونو کي د مطالعې لپاره کښېښوول سي او هر څوک چي يې چاپوي په ښه او ښايسته قطع او صحافت يې چاپ کړي او په لږ ارزانه بيه يې بازار ته وړاندي کړي.
په پای کي دعا کوم چي لوی څښتن جل جلاله دي زموږ په ګران اسلامي هيواد کي د سوچه، سپېڅلي اسلامي نظام په راوستلو سره زموږ دا اوږده غميزه په خپل فضل او مرحمت، په خير، عافيت او سرلوړي هر څه ژر په امن وامان او نېکمرغۍ او خوشالۍ بدله کړي.
والسلام
ستاسو عبدالمالک همت،
د ۱۳۹۵ لمريز کال د چنګاښ لومړۍ نېټه، کابل